قدیم ترین بانسریوں کی دریافت

جرمنی میں سائنسدانوں نے اس قدیم ترین ساز کی تفصیلات جاری کی ہیں جس کا تعلق پینتیس ہزار سال قبل کے اس زمانے سے ہے جب جدید انسانوں نے یورپ کو نوآبادی بنانا شروع کیا تھا۔

ان سائنسدانوں کا کہنا ہے کہ بانسری قدیم ترین ساز ہے۔

محققین کا کہنا ہے ما قبلِ تاریخ دور میں موسیقی کا خاصا پھیلاؤ حاصل تھا۔

ان محققین کا خیال ہے کہ غالباً موسیقی ایک ایسا پہلو تھا جس سے جدید انسان کو حجری دور کے انسانوں پر امتیاز حاصل ہوا۔

ٹیوبنجن یونیورسٹی کی ٹیم نے ان تین بانسریوں کی تفصیلات شائع کی ہیں جو جنوب مغربی جرمنی کے علاقے ہولیا فیلس کے غاروں سے ملی تھیں۔

یہ غار پہلے ہی ابتدائی انسان کی موجودگی اور زندگی گزارنے کی جد وجہد کے آثار کے حوالے سے معروف ہیں۔

گزشتہ مئی میں اس ٹیم نے ہولیا فیلس سے ملنے والے حسن و محبت کی دیوی وینس کے مجسمے کے بارے میں تفصیلات جاری کی تھیں اور ان کا کہنا تھا کہ یہ اب تک دریافت ہونے والا وینس کا قدیم ترین مجسمہ ہے۔

اب جن بانسریوں کی تفصیلات جاری کی گئی ہیں وہ گدھ کے پروں میں پائی جانے والی ہڈیوں سے بنائی گئی ہیں۔

ان میں سے ایک بانسری بیس سنٹی میٹر لمبی ہے اور اس میں تقریباً یکساں فاصلے سے پانچ سوراخ بنائے گئے ہیں جب کے اختتامی حصے کو انگریزی حرف وی کی شکل میں تراشا گیا ہے۔

دوسری دو بانسریاں ہاتھی کے دانتوں سے بنائی گئی ہیں۔ ان تین بانسریوں کی دریافت سے اس دور کی اب تک دریافت ہونے والی بانسریوں کی تعداد آٹھ ہو گئی ہے۔

مردانہ جنسی مرکب دماغ کے لیے مفید

سائنسدانوں کا خیال ہے کہ ایک سالمہ یا مالیکیول جو فشار خون (بلڈ پریشر) اور مردوں میں ایستادگی کے مسائل کو کنٹرول کرتا ہے دماغ پر زبردست اثرات کا حامل ہوسکتا ہے۔

یونیورسٹی آف لیسٹر میں محققین کی ٹیم کا خیال ہے کہ نائٹرک آکسائڈ ہمارے سوچنے اور سننے کی قوت کو تبدیل کرنے کی صلاحیت رکھتا ہے۔

سائنسدان کہتے ہیں کہ یہ مطالعہ امکانی طور پر آدھے سر کے درد، میرگی اور نسیان یا بھولنے کی بیماری کے نئے علاج میں مددگار ہوسکتا ہے۔

مردانہ کمزوری کو دور کرنے یا ایستادگی کو بہتر بنانے میں نائٹرک آکسائڈ کے کردار کو اس وقت شہرت ملی جب یہ دریافت ہوا کہ ویاگرا کے استعمال سے اس کے اثرات میں اضافہ کیا جا سکتا ہے۔

خیال ہے کہ اس کے سالمے جسم کے خلیات کے باہمی رابطے میں مددگار ہوتے ہیں۔ اور یہ بات معلوم ہے کہ اس مرکب کی تیاری میں مدد دینے والے کیمیائی مادے دماغ میں زیادہ فعال ہوتے ہیں۔

محقق ایڈم ٹوزر کا کہنا ہے: ’سوال یہ پیدا ہوتا ہے کہ جو مالیکیول یا سالمہ جنسی عضو میں ایستادگی کا باعث ہوتا ہے اس کا دماغ میں کیا کام۔‘ انہوں نے توقع ظاہر کی کہ اس تحقیق سے دماغی خلیات کے باہمی رابطوں کے پیچیدہ عمل کو سمجھنے میں مدد ملے گی جو آگے چل کر ضعف کے نئے علاج کا پیش خیمہ ہوسکتی ہے۔

سائنسدان اس بات کو جاننے کی کوشش کریں گے کہ نائٹرک آکسائڈ خلیات میں رابطے کے اس نظام کو کس طرح متاثر کرتا ہے۔